SVS

O365

Matur

Atlantbib

Hvalvík

Hósvík

BOÐKLIVIN

Næmingar

Boðklivin

Flokslærari: Mirjam Zachariasen tlf. 722382

Teldupostur: mirjam.zachariasen@skulin.fo

27.03.20

Hey Bjarni, Bjørn, Bodil, Ejnar, Eyðbjørg, Gudmar, Jacob, John, Niclas, Oddvør, Sára og Sigfríður :)

Eg hopi, at tað gongst tykkum væl. Vónandi er tað, sum tit fáa í vikuseðilin passaligt og ikki alt ov nógv. Tá tit skulu lesa Hervør og Høgna, so kunnu tit fáa foreldrini at hjálpa tykkum, um tit halda, tað vera ov torført. So skulu tit bara royna at lesa krabbabøkurnar, sum tit hava fingið heim við :)

Um tit hava okkurt at spyrja um, ella vilja hava eitt prát, so kunnu tit altíð ringja :)

Vinarliga

Mirjam tlf.722382

22.03.20

Góðu foreldur

Í vikuskiftinum varð avgjørt, at skúlarnir hava stongt fram til páskafrítíðina.

Hetta hevur við sær, at øll framhaldandi eru heima og royna at fáa sum best burturúr. Tískil er sjálvandi ymist, hvussu nógv tit foreldur hava at gera, bæði við skúlatingum, arbeiðið og øðrum.

Flestu tykkara gera skúlating við tykkara børnum dagliga. Men nú skúlin er avlýstur, er tað nakað meira enn vanligt. Tykkara børn hava fingið bøkur og annað tilfar við heim, at arbeiða við næstu vikurnar. Vónandi gongst væl við at hava heimaskúla. Ætlanin er ikki at tyngja gerandisdagin hjá tykkum óneyðuga nógv. Men tað hevur stóran týdning at halda tykkara børnum til og tryggja, at tingini verða gjørd, sum standa í vikuætlanunum

Tær næstu vikurnar fara lærarar framhaldandi at leggja skúlating út á floksheimasíðuna.

Hent heimasíða at taka til, sum hjálp til heimaarbeiðið er Snar.fo og viðheftu leinkju: https://snar.fo/heimaundirvising/

Her kunnu tit finna nógv ymist tilfar/spøl til ymisku flokkarnar og lærugreinarnar.

Um so er at tit mangla tilfar o.a. til heimasetningin, sum av onkrum orðsøkum ikki eru komin heim við tykkara barni, eru tit vælkomin at ringja ella skriva til flokslæraran ella læraran í fakinum.

Sí viðheftu leinkju yvir telefonr hjá lærarunum: http://www.svs.fo/?p=123

Um tit hava spurningar av ørðum slagi enn tilfar o.a í fakunum, eru tit vælkomin at skriva ein teldupost til svs@svs.fo

Vit vóna, at tit koma væl ígjøgnum hesar næstu vikurnar.
Vit ynskja tykkum framhaldandi góðan dag.

Vinarliga

Sonni Óli Djurhuus, skúlastjóri

Dato: 13.03.20

Hey tit :)

Nú eru vit í eini serligari støðu. Hanna og eg hava koyrt inn í vikuseðilin, vónandi er hetta passandi fyri tykkum. Um tit ivast í onkrum ella okkurt er, so eru tit altíð vælkomin at ringja ella skriva :)

Hvør næmingur hevur fingið fýra krabbabøkur heim við. Hesar eru ætlaðar til at lesa eitt sindur úr hvønn dag. Vit hava tosað um, at gott er at lesa eina lítla løtu, áðrenn tey leggja seg at sova. Vónandi gongur hetta væl. Alt tað besta :)

Um tit hava hug at rokna á teldu eisini, so kunnu tit fara inn á hetta leinkið:

Heimasíðan hjá Snar.fo - Rokning 2a (Multi 3a er norska heitið)

http://80.77.131.132/multi/1-4nettoppgaver/multi3a

(ovast í breddanum stendur "ikke sikker", trýst á har og vel síðani "tillad" við Flash og "genindlæs" síðuna - so skuldi rigga :-)

Vit hoyrast

Heilsan

Mirjam tlf. 722382

Hey tit

Mentamálaráðið hevur kunnað Skúlin við Streymin um, at skúlagondin við undirvísing steðgar fyribils frá mánadegnum 16.03 og til við sunnudagin 29.03. Hetta er fyri at avmarka smittuvandan av Korona virusið.

Sí skriv frá UMMR:

Jenis av Rana, landsstýrismaður í uttanríkis- og mentamálum, hevur gjørt av, at allir næmingar í fólkaskúlanum skulu vera heima við hús skjótast til ber og í seinasta lagi frá mánadegnum 16. mars 2020. Fyribils skulu næmingarnir vera heima í tvær vikur.

Í hesi serstøðu, sum allur heimurin er komin í, verður neyðugt, at ávís starvsøki halda fram ótarnað. Her er talan millum annað um heilsuverkið, eldraøkið, løgregluna, tilbúgvingina og innan ávísar vinnur. Hesi starvsfólk mugu røkja sínar arbeiðsligu skyldur, og hetta kann hava við sær avbjóðingar viðvíkjandi ansing.

Skúlarnir og frítíðarskúlarnir mugu tí hava opið í neyðugum vavi fyri børn, sum ganga í forskúla og 1., 2. og 3. flokki, har eingin onnur ansing er møgulig. Henda serskipan er bara galdandi hjá teimum børnum, hvørs foreldur starvast á serliga avgerandi økjum, og sum ongan møguleika hava fyri ansing annars.

Hesi foreldur mugu venda sær til skúlaleiðsluna við grundgevingum fyri, hví tørvur er á hesum tilboði. Skúlans skylda í hesum sambandi er frá á morgni sum vant og til middags, tá ið frítíðarskúlin tekur yvir.

Harafturat fara skúlaleiðslurnar at seta fyriskipanir í verk, so undirvísingin við tøkniligum hentleikum kann halda fram so væl sum gjørligt, hóast næmingarnir eru heima. Hetta er serliga galdandi fyri hádeildina og tey, sum skulu til próvtøku.

G.G Um so er at tit ikki kunnu skipa fyri ansing av tykkara børnum, sum arbeiða innan ásettu karmar, sum landsstýrismaðurin lýsir, heilsuverkið, eldraøkið, løgregluna, tilbúgving og ávísar vinnur, mugu tit venda tykkum til okkara gjøgnum fráboðanarskipanina á heimasíðu skúlans, í seinasta lagi í morgin fríggjadagin kl.18.00. Hetta so skúlin kann skipa dagarnar best møguligtfyri tykkara næmingar.

Í morgin fríggjadagin, er vanlig skúlagongd og vera tit biðin um, at biðja tykkara børn um at koma í skúla og taka e.v.t bøkur, sum liggja í skúlanum við heim. Lærarar skúlans koma at leggja skúlating út á vikuætlanirnar fyri tær báðar vikurnar næmingarnir eru heima og skulu næmingarnir fylgja henni.

Sonni Djurhuus, skúlastjóri

Hey tit

Her er góð kunning um Corona virus. Sí viðheftu leinkjur:

https://www.hmr.fo/fo/arbeidsokir/heilsa-og-fyribyrging/corona-covid-19/

https://ls.fo/sj%C3%BAklingar/kanningar-og-vi%C3%B0ger%C3%B0ir/corona-covid-19/?fbclid=IwAR2Ws49HvUW8jfMYkPoSunPA4RoceZjick1DSWXPfriPTjFi1FaIzQEAfzI

https://landslaeknin.stps.dk/

Leinkja til at vaska hendurnar væl:

http://gigni.fo/data/attachments/2260DC4F-FEA3-47B5-8378-89C05CB08E0B/5363771B-8EF3-42AD-B4A6-FD0DF91A3ED4.pdf

Leiðslan